بكرة أجمل من النهاردة.. بكرة جايب معايا وردة
جايب حلم.. جايب أمل.. جايب فكرة كانت شاردة
***
يوم ميلادي يوم معروف.. يوم مماتي مفيهشي خوف
جينا الحياة بالحب .. ويارب نفارق بالمعروف
***
كفى القلب اكتفى!.. جرح فلسطين ما شفا
وعد العروبة ما وفا.. فجر فلسطين ما خفا
***
قالوا الحياة إزاي نعيش.. قلت الحياة إزاي نموت
قالوا الحياة جوة الحياة.. قلت الحياة جوة التابوت!
***
عشت الحياة عيشة غلط.. كلها طوب ورمل وزلط
ربي يا قادر على كل شيء.. سخر لي نفسي مهما علت
***
الموت قريب قوي مننا.. ودي حكمة عارفينها كلنا
بس ياخسارة لسة معرفناش.. نحب ربنا.. ونحب بعضنا!
***
عجايب يا زمن العجايب.. الأندال أصبحم حبايب
وكل شيء بتاخده يا زمن.. ويظهر كدة مش جايب!
***
عشان قولة حق تركوني.. والزمن ظلمني وهما ظلموني
والله لأقول الحق دايماً.. مهما كدبته عيوني..
***
الدنيا متسابة واحنا فيها ضيوف.. والخلق قلابة وبتنسى المعروف
وده حالها دايما غير المألوف.. يعيش فيها الديابة ويموت الخروف
***
كم عيد عدى علينا ومعيدناش.. وكم فرحة عدت علينا ومفرحناش
طال العمر بينا ومعشناش.. الفرح بقاله تمن! والحزن ببلاش..!
***
عيني لما غمضت شافت كتير.. فتحت فجأة لقيت الكون صغير
ولقيتني متقيد ومتسلسل أسير.. ركبت جناحين لكن..معرفتش أطير!
***
عيني عليك ياجدع ياصغار السن.. قلبي عليك انخلع ولساه بيئن
والشوق والحنين خلوا عقلي يجن.. وكل يوم يا حبيبي قلبي ليك يحن
***
لو بإيدي الحياة كنت معشتهاش.. لو بإيدي الموت كنت أقول يا بلاش
يارب يا خالق كل شيء .. أنا لك ونفسي دي ماخلقتهاش..
***
أنا اللي عشت الحياة بغبغة.. وكنت يا خسارة فاكرها نغنغة
هي الحياة كدة تعيشها بغبغان.. أو لسان من غير لغة..!
***
يا طريق واسع من غير أبواب.. يا زمن خاين غدار كداب
لو فتح باب وانعدل زمن.. ازاي نعيش من غير أحباب
***
يعني إيه أعيش العمر من غيرك.. وأنا اللي كنت راهب جوة ديرك
أنا اللي عشت حياتي اسيرك.. ازاي كدة تهجريني.. كتر خيرك
***
زماني وراح هدر.. وصاحبي بية غدر
ولما سألت ليه ؟.. قالوا حكم القدر!
***
عمر فوزي
Omarfawzi3041966@gmail,com
