تلقي موقع مصريون في الكويت رسالة من عضو الموقع ايهاب عادل، تشمل خطوات العوده إلى دولة الكويت عن طريق الترانزيت ١٤ يوم من خلال دولة الامارات العربية المتحدة، حيث قدم شرح من واقع التجربة ( أخر تعديل ١٤ اغسطس ٢٠٢٠، مؤكدًا انه كان يوجد مصريين في دبي ودخلو الكويت اليوم فعليا بعد الترانزيت بهذذة الطريقة.
وجاءت الخطوات كالأتي:-
اولًا طريقة تنفيذ العودة ترانزيت
اول خطوة اصدار فيزا سياحية لمدة شهر للامارات ودى تقدر تعملها اون لاين لو معاك اقامة فى الكويت ب ١١٠ دولار أو مكتب سياحة لان فى مكاتب بتخلصها فى يوم و تكلفتها بالتأمين من المكتب ٢٠٠٠ جم بصورة الجواز و صورة شخصية ( الفيزا بتاخد ٥ أيام عمل و لكن ممكن مكتب يخلصالك فى يوم و مكتب فى ٢ ال ٥ ايام ده الحد الاقصى مش مده زمنية ثابته للاصدار )، “/انا مش بعمل اعلان والله ولا مستفيد من الجزئية دى حاجه و لكن انا اتعاملت مع شركة محترمة اسمها باراديس ترافل فى المقطم وورقي خلص فى وقت قياسي ودى بياناتهم”.
الصفحة
الخطوة الثانية:-
تستلم الفيزا تحجز طيران ذهاب لدبي من مصر و سعر التذكرة تقريبا ٥١٢٠ على الاماراتية وتحجز من دبي للكويت و هنا تقدر تستخدم رصيد تذكرتك الملغاة من مصر للكويت و تحولها لتذكرة من دبي للكويت و لو ما كنتش حاجز عودة تقريبا التذكرة ب ٣١٠٠ على الجزيرة و تكلم شركة السياحة يحجزلك التأمين الصحي وتحجز الفندق او السكن اللى يريحك من خلال بوكينج دوت كوم، وبما انى مش اماراتى و اكيد مش مساهم فى الفندق فا ده الفندق اللى حجزت فيه و سعره مناسب و ٣ نجوم و قريب من المترو و الخدمات
تطبع الفيزا والتأمين وتذكرة الذهاب والعودة وتشد الرحال على معامل وزارة الصحة تحلل و تستلم النتيجة وفى نفس اليوم او تانى يوم تسافر فوريره وخلى بالك ان البي سي ار موجه للامارات ولازم تسافر فى خلال ٧٢ ساعه من تاريخ سحب العينة اللى هو يوم التحليل مش النتيجة و ااقري الفقرة دى تانى و تالت و مليون.
ملحوظه بتقدم على البي سي ار ب ١٢٦٠ جم دلوقت مش ١٠٥٠ بالجواز الاصلي و يوم الاستلام خد صورة الجواز معاك
تنزل الابلكيشن ده و تسجل عليه من هنا، مش هاتعدى من مطار دبي من غير الابلكيشن اللى فوق.
فى PCR اجباري لكل الركاب حال وصولهم دولة الامارات حتى لو ترانزيت و بيتبعت لك رسالة على موبيلك بنتيجته وما ينفعش تتحرك من مكان سكنك قبل وصول الرسالة وده من ٨ ل ٢٤ ساعة.
ملحوظة احنا ماجالناش رسالة بنتيجة التحليل والتقيد بعدم الخروج هو لمصلحتك و لمصلحة و سلامة شعب الامارات الشقيق و الامارات بلد منظم و محترم ارجوك ارفع راسنا هناك و التزم بالتعليمات.
تعد ١٥ يوم من تانى يوم وصولك لدبي لحجز البي سي ار للكويت لان رحلة الترانزيت ال ١٤ يوم هم اولا ١٦ او ١٧ يوم مش ااقل نقول ليه يوم السفر هو زيرو داى يعنى ال ١٤ يوم تحسب من تانى يوم و صولك لدبي يعنى لو وصلت الاحد ١٢ صباحا تبدأ تحسب من الاتنين و البي سي ار يتعمل فى اليوم ال ١٥ مش اليوم ال ١٣ لا هو عايزك تقعد ١٤ يوم كاملين اللى هم فترة الاعراض و بعدين تحلل و تستلم اليوم ال ١٦ او ال١٧ و تسافر و عشان تكون فى الامان خليها ١٧ يوم مش اقل.
نصائح مهمة
ارتداء الكمام فى الامارات اجباري و غرامة عدم ارتدائه ١٠٠٠ درهم، وحاول تخلى رحلات الطيران فى نص اليوم بحيث تدخل دبي او الكويت قبل ١٢ صباحا عشان ما يحصلكش مشكلة فى صلاحية تحليل ال PCR.
لو حجزت ستوديو انت و ٢ صحابك و ظبطو اكلكو و عيشتكم مع بعض ها توفرو جدا او غرفة ثلاثية فى فندق.
مصاريفك انت اللى بتحددها و لكن ١٠٠٠ درهم مبلغ يغطي كافة الاساسيات و ده مقابل الجنيه المصري ب ٤٣٦٠ مع الفروقات البسيطة بين البنوك و شركات الصرافة و الريت اليومي لبورصة العملات العالمية.
عروض شركات السياحة الباكيدج الكاملة غالية جدا لما تضيف عليها كمان مصاريف جيبك هناك و التحليل فى دبي.
تأجير السيارات فى الامارات غالي و لكن لو مجموعه التكلفه معقولة و برخصتك الكويتي تقدر تسوق.
اسكن جمب المترو ها يوفرلك كتيير و اعتقد منطقة الرقة افضل منطقة شعبية سهله سلسه و فنادقها و خدماتها رخيصة و مقبولة للغرض ده و تقدر تصدر كارت محطات المترو من مكتب الاستعلامات و تشحنو على الماكينة اوفرلك كتيير.
نزل برنامج سكاى بي لان فايبر هنا سىء للغاية و الماسينجر مقفول مكالماته لخارج الامارات او برنامج زووم عشان تعرف تكلم الاهل و الاصدقاء و تطمنهم عليك.
فى ناس كتيير قلقانه و عايزه ترجع الكويت لشغلها و اهلها و مصالحها حاول تساعدهم على قد ما تقدر و توسع صدرك لأسئلتهم لان فيهم الخايف و الرجل البسيط و الغير متعلم نفس تعليمك.
رابط الفيديو
https://m.facebook.com/story.php?story_fbid=10222290119177296,1095630541
