كشفت منة الله ابنة الفنانة الراحلة شويكار، عن الوصية الأخيرة لوالدتها قبل وفاتها، وهي عدم إقامة عزاء لها حتى لا تزعج أحد، مؤكدة إنها طلبت هذا الطلب قبل مرض كورونا بفترة كبيرة.
وأكدت منة الله من خلال مداخلة هاتفية مع الإعلامي وائل الإبراشي ببرنامج “التاسعة”، أنه والدتها الفنانة “شويكار” لم تصارع المرض حتى قبل لحظات من وفاتها، وقالت: “كانت دايما بتقول الحمد لله وعمرها ما اشتكت من أي تعب، وقبل ما تموت بطنها وجعتها بس، وهى كانت بتحب كل الناس، وكانت مليانة حنان ومشاعر ناحية كل الناس اللى حواليها، وفي السنوات الأخيرة مكنتش عاوزة تظهر كتير قصاد الكاميرا”.
واستكملت: “مامي عمرها ما بتتكلم عن الذكريات، وكانت بتقول معنديش حاجة في حياتي أقولها رغم أن حياتها كانت مليانة حاجات مهمة، لكنها كانت شديدة التواضع، كانت ست متواضعة لأقصى درجة، ولما تعبت، قالتلي أنا رايحة المستشفى ومش هرجع تاني، كانت حاسة أنها هتموت”.
وتابعت: “قالتلي أوعى تعملي عزاء، كانت دي وصيتها، قالتلي أوعى تزعجي الناس بعزايا، كانت بتقول كده من زمان أوي قبل كورونا، وهي كانت ست بيت بتطبخ وتعمل كل حاجة، وأكتر حاجة كانت بتفرحها أنها تشوفني أنا وبناتي فرحانين ومبسوطين وفضلت تحب فؤاد المهندس لحد أخر لحظة وهو كمان كان بيحبها، وهو بيموت كانت واخداله حمام محشي ورايحاله”.
