قالت الفنانة ناهد السباعي “أنا متعقدة من الرجال بسبب جوابات جدي الفنان الراحل فريد شوقي لوالدتي”، وذلك خلال ردها على سؤال طرحته الإعلامية بسمة وهبة، قالت فيه “انتي متعقدة من الرجال؟”.
وقالت “ناهد”: “ممكن أكون معقدة من الرجالة، لأني اتربيت في بيت كان جدي فريد شوقي بيكتب فيه جوابات لأمي، ووالدي سماني ناهد على اسم مامتي من كتر ما كان بيحبها”.
وأضافت: “مش هلاقي رجالة زيهم عشان كده بقيت معقدة، إخواتي بيدلعوني جدًا، ولما ده بيحصل في البيت صعب البنت تقبل بأي راجل”.
وكشفت “ناهد” سبب انفصالها عن خطيبها، وهو نشوب خناقة بين خطيبها مع شخص في الشارع أمام والدتها، وقالت: “وأنا اضايقت أن ده حصل قدامها لأن لها مكانة كبيرة عندي والمفروض ده ميحصلش قدام والدتي وده السبب.. ووالدتي خط أحمر”.
وأضافت أن خطيبها كان شخصًا طيبًا جدًا وأهله ناس رائعين فوق الوصف، قائلة: “أنا مقدرش ابني سعادتي وراحتي على آراء الناس”، مشيرة إلى أنها اتخطبت لمدة 6 أشهر، قائلة: “ممكن يكون عصبي ولكن عمره ما مد إيده عليا ومحدش يقدر يمد إيده عليا” .
وتابعت: “غلطنا في بعض كتير.. وبعد وفاة والدي، أخويا يوم الفرح مكنش سعيد ويوم كتب كتابي كان يوم العياط العالمي ونفسي أتجوز ويبقي عندي طفل.. ممكن أكون معقدة من الرجالة وانا اتربيت في بيت جدي بيكتب جوابات لي وأخويا كان حلو ومفيش في جماله، وملقتش زيهم ومفيش زيهم “.
وردت الفنانة ناهد السباعي على اتهامها بتعمد ارتداء ملابس مثيرة للفت الانتباه في المهرجانات، قائلة: “أنا فوجئت بتعرض فستاني للقطع في مهرجان بيروت للسينما، وزعلت من الصحفيين لأن محدش منهم قالي إن الفستان اتقطع”.
وأضافت: “شرابي بان، وأكيد مكنتش أحب أبينه، وقبل ما أنزل ماما ربطت الفستان بدبوس”، لترد عليها بسمة وهبة ممازحة إياها وقالت: “هو الدبوس بيستر يا ناهد”.
وتابعت: “والله ما كنت أعرف إن ده هيحصل، أنا لو لابسة عريان من فوق مينفعش يبقى عريان من تحت، العري مش شياكة، العري مبقاش مميز على الريد كاربت، لأن الناس كلها بقت تلبس عريان، لكن ممكن ألبس فستان غريب عشان أجذب الانتباه”.
