قالت، هند الروبي، والدة أسامة بطل فيديو “طفل البلكونة” إن أبنائها هم فلذة أكبادها ولا يمكن أن تأذيهم بأي شكل من الأشكال مؤكده أنها تعمل ليل نهار من أجل مساعدة زوجها المريض وإكمال تعليمهم كي يتمكنوا من التخلص من الفقر الذي تعيش فيها الآن.
وأضافت “الروبي” في أول حوار عقب الإفراج عنها من قسم شرطة ثالث أكتوبر بعد توقيعها على تعهد بعدم التعرض لأطفالها والحفاظ عليهم والزامها بمتابعة شهرية من قبل فريق بوزارة التضامن لحالة الأطفال.
وإلى نص الحوار:-
احكي لنا ماذا حدث؟
أنا نزلت اشتري خضار من السوق لقيت الباب مقفول والأولاد برة وقالوا إنهم نسيوا المفتاح في الباب من جوا ، حاولت كتير افتح الباب بطرق مختلفة لكني فشلت.
هل مكنشي فيه حل غير إنك تعرضي ابنك للخطر؟
حاولت كتير انا قعدت من صلاة الجمعة لحد المغرب على ما دخلت الشقة والفيديو ده اتصور العصر.
إزاي جت لك فكرة البلكونة دي؟
الفكرة هي فكرة أسامة ابني، هو اللي قالي أنا هطلع من شباك الجيران للبلكونة وهدخل أفتح الباب زي ما يوسف الصغير عملها قبل كدة
ازاي فكرته وهو كان بيصرخ؟
أنا وافقت بصعوبة جدًا، ولما كنت بمسكه من رجليه عشان ميقعشي بس غصب عني ايدي اتخطفت مني وكان هيقع وجسمي طار كله بره
وجبته عشان ميقعشي ودخلته”.
بس اللي ظهر في الفيديو غير كدة؟
اللي صور الفيديو مصوروش بالشكل الصحيح “أنا طلعت خطفته مرة واحدة.. ولما كنت بطلع ابني مضربتهوش ولا أذيته في شيء ولو أذيته كان قال في النيابة”.
فتحتي الباب إزاي بقى؟
حاولت فتح الباب بـ”مفك” معرفتش، اضطريت أكسر قلب الباب وبعدين جبت النجار ركب قلب ثاني واخد 15 جنيه.
بتعرضي حياة ابنك للخطر عشان 15 جنيه؟
يا أستاذ، أنا كنا بابيع فاكهة وبكسب في اليوم كله 10 جنيه، وحاليا شغالة عاملة نظافة في مدرسة وبقبض 300 جنيه في الشهر كله.
بتشتغلي ايه؟
أنا بشتغل عاملة في مدرسة في حدائق أكتوبر وبقبض 600 جنيه في الشهر لكن لحد نتنش اعتمادي على موازنة المدرسة فمديرة المدرسة كتر خيرها بتديني 300 جنيه في الشهر مساعدة.
عندك كام طفل؟
عندي 4 أطفال، أسامة الكبير 13 سنة وفي الصف السادس الابتدائي، ويوسف في الصف الثالث الابتدائي، وياسين في الصف الأول الابتدائي، ويوسف في الحضانة.
زوجك شغال ايه؟
أنا جوزي، كان أرزاقي على باب الله يشتغل عامل ورا صنايعي سيراميك، بتاع محارة، أي حاجة وكنا مستورين الحمد لله لحد ما
تعب ومبقاش يقدر يشتغل.
هو تعبان عنده ايه؟
جوزي بيتعالج من مرض الاثنى عشر ومن جرثوم في المعدة ومبقاش بيقدر يشتغل، حتى التوكتوك اللي كان حيلتنا المرور أخده ومش عرفنا ندفع المخالفات بتاعته.
ايه أصعب موقف مر عليكي النهاردة؟
أصعب موقف إني قعدت في القسم فترة طويلة أنا حزينة بس على ابني أنه راح القسم.. طفل صغير ميعرفش حاجة دخل في وسط مجرمين”.
الموقف الثاني هو إن ابني مروان اللي عمره 3 سنين شافني بعيط في النيابة قالي مش تعيطي يا ماما تاني.
أنتم منين في الأصل؟
إحنا من ابشواي في الفيوم، جوزي هو ابن عمي وكنت عايشة معاه مع اخواته الثلاثة المتجوزين في بيت واحد قولت اجي القاهرة وأسيب البيت عشان نوسع لبعض.
قدمت على شقة في 2015 تبع الاسكان الاجتماعي والحمد لله أخدتها.
طلباتك ايه ياستي؟
أنا نفسي بس يخفوا عني قسط الشقة شوية لأني بدفع 800 جنيه في الشهر وجوزي مش بيشتغل ومش معايا أعيش عيالي، لو يدوني معاش يساعد معايا عشان اقدر اعيش واعلم ولادي.
اتعلمتي من اللي حصل؟
درس لا يمكن انساها طول حياتي، والحمد لله ان ابني بخير.
حاج عبد الرازق .. ايه اللي حصل؟
العيال نسيوا المفتاح داخل الشقة وفكرة القفز من الشباك دي كانت فكرة الولد مش فكرة والدته، وهي مش أجبرت على كدة دي أمه وأكيد خايفة عليه.
يعني مكنتش خايف يقع؟
المسافة مكنتشي كبيرة و لا تتجاوز 70 سم يعني خطوة والولد كان يقدر ينطها عادي، وزوجتي تعبت من القعدة على السلم طول اليوم وفشلت أكتر من مرة تفتح الباب.
هل زوجتك بتتضربهم باستمرار؟
لا عمرها ما أذتهم دي حنينه عليهم أوي، وأحن عليهم مني أنا كمان.
