بسم الله الله الرحمن الرحيم
قُلْ إِنَّ صَلاتِي وَنُسُكِي وَمَحْيَايَ وَمَمَاتِي لِلَّهِ رَبِّ الْعَالَمِينَ * لا شَرِيكَ لَهُ وَبِذَلِكَ أُمِرْتُ وَأَنَا أَوَّلُ الْمُسْلِمِينَ
صدق الله العظيم
السلام عليكم ورحمه الله وبركات
أهلا وسهلا بك في موضوع جديد قديم.. في الحقيقة أحنا هنتكلم اليوم عن موضوع السفر بره مصر.. وده موضوع يهم الجميع سواء الشباب الجديد ألي عاوز يسافر أو الناس ألي مسافرة بره مصر من زمان.
بداية هنقول ان المصريين في الخارج تخطوا حاجز 10 ملايين مصري في الخارج وده رقم تقريبي لأن مافيش حد يعرف الرقم المظبوط وده طبع حاجة مش تمام لأن عشان تعرف تحل مشكلة لابد تكون عارف أبعدها والبيانات الصحيحة جزء من حل المشكلة.. وده مش موضوع اليوم بس حبيت أعرفكم أن الرقم كبير والجزء الاكبر من ال١٠ ملايين دول يتركز في دول الخليج السعودية والكويت والامارات..
ويلله نبدأ بالسؤال الشهير.. أنا جالي عقد اسافر الكويت فيزا حره ومطلوب ادفع مبلغ وقدره ١٠٠٠٠ ألف جنيه.
أولاً ده سؤال بيجي دائماً من اخونا الصعايدة.. وغالبية المصريين في الخليج من الصعايدة وللحقيقة مافيش حاجة اسمها فيزا حرة.. الفيزا فيزا هو عاوز يقولك أنك هتكون على شركة ولك حرية العمل في مكان اخر.. يعني الكفيل هيخليك تشتغل بره.. ودي شركات تحت بير السلم بالمثل المصري المعروف.. يعني هو راجل أجر مكتب ب ١٥٠ دينار في الشهر واخد عليه الرخصة بتاعت الشركة وجاب للشركة دي او المكتب ٣ أو اربع اقامات من الشؤون وبعدين يقفل المكتب وياخد من كل واحد ١٠٠ ألف جنيه اقل تقدير ..
السؤال بقى انت سافرت ولا لسه؟
إذا لسه مسافرتش هقولك ارفض العرض ده.. سواء جالك عن طريق ابن عمك أو من خلال شركة سفريات او من خلال واحد صحبك .. لو انت معاك ١٠٠ ألف جنيه او عرفت تجمع ١٠٠ الف جنيه اعمل بيهم اي مشروع في مصر اي مشروع افضل لك لآن انت في مصر هتتعرف على ناس كتير من خلال المشروع ده وهتعمل علاقات كتيرة والعلاقات دي فلوس على فكرة .. بعكس ألي جاي من بره ومعاه فلوس ومعندوش علاقات عشان يبدأ هياخد وقت طويل إلى ان يستطيع ان يبني شبكة علاقات.. واكبر مثال على كده السوريين في مصر استطاعوا ان يكونوا رقم كبير في السوق المصري وخاصة في مجال المطاعم.. واستطيع ان اجزم بأنهم إذا خيروا بين البقاء في مصر أو الرجوع إلى سوريا هيقولك في مصر.
ويلي من الغربة يابا ويلي
بعد سنين في الغربة شفوني
قالولي جايب ايه من بره
قولت ياريتهم لو سألوني
انا في الغربة بكيت كام مره
جبت حجات من اللي يحبوها
جبت فلوس وياريت يخدوها
ويردولي شباب ضاع مني
وسنين مت وهما عاشوها
على ايه بس يا ناس حاسدني
واشقى مافيكم اسعد مني
انتم عشتم احلى سنينكم
وانا في الغربة معشتش سني
انا الكبير قبل اواني
وبختي للغربة رماني
خدو مني كل اللي جمعتو
وارجع صغير من تاني
انا راح عمري الم ودموع
انا قضيتها سفر ورجوع
وان فكرت اضحك من قلبي
قلب الغربه يقول ممنوع
اتحملت يا ناس فوق طاقتي
واتغربت في عز برأتي
كتبو لكل الناس عنوانها
وانا كتبولي غريب في بطاقتي
ثمن الغربه دفعته بدمي
بسنين فيها بعيد عم امي
ولما نويت ارجع علشانها
رحلت لأجل تزود همي
مين في الغربه يا ناس مبسوط
مين على راحتو مش مضغوط
مين اتحدى يقول مش خايف
انه بعيد عن بلده يموت
يلي بتسعى عشان تتغرب
خدها نصيحة و اوعى تجرب
كلها بدوقه في بلدك واوعى
من مشاوير الغربه
تقرب
لاتدفع فلوس للسفر للخليج ده كلام نهائي إذا كنت عاوز تشتغل في شركة محترمة ومش عاوز تتبهدل الشركات المحترمة ما بتخدش فلوس من الناس ألي عاوزها تشتغل معاها.
لأنك لو سافرت على شركة من الشركات ألي هي تحدت بير السلم يبفى ده بداية الفشل ليك في الغربة
هنقول أنك سافرت وتورط في السفر.. تعمل أيه؟
وصلت الكويت خلاص وروحت للكفيل .. والكفيل قالك روح اشتغل في اي حتة انا معنديش مكان ليك .. هتبتدي تدور على شغل في اي مكان.. المهم هتروح للكفيل او صاحب الشركة وتقوله انا حصلت شغل في شركة تاني وعاوز احول الكفالة.. فيه احتمالين.. الاحتمال الاول هيقولك هات ورق التحويل عشان احولك وده هيكون راجل كويس وهيبقى مافيش مشكلة أما الاحتمال الثاني هيقولك عشان احولك لازم تدفع مبلغ معين وده يرجع حسب طمع الشخص نفسه.. وهنا بقى تبقى المشكلة يا أما هتوافق على الدفع وتدفع بالدين والسلف يا أمي هتقوله أنا معنديش فلوس لأني لسه على باب الله يقولك انا مش هحولك غير لما تدفع.. وهنا قولك روح المكتب العملي في القنصلية المصرية لأن ده شغلهم وتعرض عليهم المشكلة وهما هيوجهوك تعمل ايه.. يا أما يحاولوا بالطرق الودية مع الكفيل، أو تكون الطرق القانونية هي الحل.. هيقولك روح للشؤون قدم شكوى وهيقولك في المكتب التمثيل العمالي تقول أيه في الشكوى.. وبعد وقت هتقدر طال أو قصر هتحول على الشركة الجديدة .. وطبعاً هتتبهدل بين الكفيل القديم والجديد والقنصلية والمكتب العمالي والفلوس مفيش إلى ان تستطيع التحويل على شركة تانية.. كل ده ليه عشان البداية كانت خطأ..
